मूकनायक न्यूज नेटवर्क
(मूकनायक प्रतिनिधी.गणेश मच्छिंद्र भोसले )
Nagpur Double Murder Case Update : ओमकारने नागपूर शहरातील दोन व्यावसायिकांचे अपहरण करुन त्यांचा खून केला होता. या प्रकरणाच्या चौकशीदरम्यान त्याचे आणखी कारनामे बाहेर आले
हायलाइट्स:
* ओमकार तलमलेकडून १११ तरुणांची कोट्यवधींना फसवणूक
* ओमकार नागपूरच्या कोंढाळी दुहेरी हत्याकांडाचा मुख्य सूत्रधार
* पाच कोटी ३१ लाख ७० हजार रुपयांची फसवणूक केल्याचा आरोप
नागपूर : कोंढाळी दुहेरी हत्याकांडाचा मुख्य सूत्रधार ओमकार महेंद्र तलमले याने मोठी फसवणूक केल्याचे समोर आले आहे. स्वतःला नासाचे शास्त्रज्ञ म्हणवत त्याने तब्बल १११ बेरोजगार तरुणांना नासामध्ये नोकरी मिळवून देण्याचे आमिष दाखवले. तलमलेने पाच कोटी ३१ लाख ७० हजार रुपयांची फसवणूक केल्याचा आरोप आहे.
२५ जुलै २०२३ रोजी ओमकारने पैशांचे आमिष दाखवून कोंढाळीजवळ काही गुंडांच्या मदतीने नागपूर शहरातील दोन व्यावसायिकांचे अपहरण केले. त्यानंतर अमरीश देवदत्त गोळे आणि निरलकुमार जयप्रकाश सिंग यांचे खून करून त्यांचे मृतदेह वर्धा जिल्ह्यातील नदीत फेकून दिले.
या प्रकरणी ओमकारला नागपूर ग्रामीण पोलिसांनी अटक केली. त्यानंतर फसवणुकीचा प्रकार उघडकीस आला. तरुणांनी हिंमत एकवटून पुढे येऊन फसवणुकीची तक्रार नागपूर शहर पोलिसांकडे केली. ओमकारने अनेक तरुणांना बनावट नियुक्तीपत्रेही पाठवली होती. नासामध्ये नोकरी मिळवून देण्याच्या नावाखाली ही सगळा फसवणूक केल्याचं समोर आलं आहे.
मनीषनगर जयदुर्गा सोसायटी एकदंता अपार्टमेंटमधील रहिवासी अश्विन अरविंद वानखेडे आणि ओमकार तलमले हे एकाच ढोल-ताशा पथकातील असल्याने त्यांची ओळख होती. ओमकारने त्याला सांगितले की तो नासामध्ये ज्युनियर सायंटिस्ट म्हणून काम करतो.
वाडीस्थित रिजनल रिमोट सेन्सिंग सेंटरमध्ये ऑफिस स्टाफ क्लास बी, ऑफिस अॅडमिन, सीनियर अॅडमिनची मोठ्या संख्येने रिक्त पदे आहेत. येथील अधिकाऱ्यांशी आपली चांगली ओळख असल्याचे सांगून त्याला नोकरीचे आमिष दाखवून दोन लाख रुपये बँक ऑफ बडोदाच्या खात्यात जमा करण्यास सांगितले. तुमच्या मित्रांना आणि नातेवाईकांना स्वारस्य असल्यास कळवा असेही त्यांनी सांगितले.
ओमकारवर विश्वास ठेवून अश्विन वानखेडेसह १११ जणांनी प्रत्येकी दोन लाख रुपये त्याच्या वेगवेगळ्या बँक खात्यांमध्ये जमा केले. त्याने प्रत्येकाच्या ई-मेलवर बनावट नियुक्तीपत्रे पाठवली. हे सर्वजण वाडीच्या प्रादेशिक सुदूर संवेदन केंद्रात रुजू होण्यासाठी गेले असता त्यांनी बनावट नियुक्तीपत्र सादर केले. मात्र तिथे त्यांना ओमकार तलमले सारख्या व्यक्तीला ओळखत नसल्याचे सांगितले गेले.
आपली फसवणूक झाल्याचे लक्षात येताच सर्व पीडित बेरोजगारांनी आर्थिक गुन्हे शाखा अर्चित चांडक यांची भेट घेतली. त्यांच्या आदेशावरुन बजाजनगर पोलिस ठाण्याचे सहायक पोलिस निरीक्षक सचिन जाधव यांनी ओमकारविरुद्ध गुन्हा दाखल केला आहे.
