🌸रिपब्लिकन सेनेची ऐतिहासिक बैठक🌸

मकनायक प्रतिनिधी: विजय बगाडे
सर सेनानी आनंदराज आंबेडकर संस्थापित ‘रिपब्लिकन सेना’ या राजकीय पक्षाची ऐतिहासिक बैठक राष्ट्रीय अध्यक्ष आनंदराज आंबेडकर साहेब यांच्या अध्यक्षतेखाली आज रविवार दि. २३ जुलै २०२३ रोजी डॉ. बाबासाहेब आंबेडकर भवन, गोकुळदास पास्ता लेन, दादर( पू.) मुंबई येथे संपन्न झाली असून सकाळी ११-०० ते सायंकाळी ५-०० वाजेपर्यंत चाललेल्या बैठकीत अतिशय गांभीर्याने चर्चा होऊन ऐतिहासिक व क्रांतिकारक निर्णय घेण्यात आले.
पारीत झालेले ठराव
———————–
१) स्थानिक स्वराज्य संस्थांपासून संसदेपर्यंत सत्तेत जाण्यासाठी सर्व प्रकारचे मार्ग चोखाळण्यात येतील.
२) स्थानिक स्वराज्य संस्थांपासून लोकसभेपर्यंत जे मतदारसंघ आपण लढवू शकतो त्या मतदारसंघांचे उमेदवार पहिल्या प्रथम निश्चित करण्यात येतील व त्यानंतरच युती किंवा आघाडीत त्या त्या मतदारसंघावर दावा करून ते रिपब्लिकन सेनेला सोडवून घेण्यात येतील.
३) निवडणूक लढवण्याची इच्छा व क्षमता असणारे कार्यकर्ते आपल्या पक्षात आणण्यासाठी वार्ड पातळीपासून लोकसभा मतदारसंघापर्यंत सर्व स्तरावरील पदाधिकारी व कार्यकर्ते प्रयत्न करतील.
४) भाजप सोडून कोणत्याही पक्षाशी युती किंवा आघाडी करण्यासाठी रिपब्लिकन सेनेने पर्याय खुले ठेवलेले आहेत. एवढेच नाही तर सध्या भाजप सोबत असलेल्या राजकीय पक्षांनी भाजपसोबतचे संबंध तोडले तर त्यांचा सुद्धा रिपब्लिकन सेना युती किंवा आघाडीसाठी विचार करू शकते.
५) आंबेडकरी चळवळीच्या नावाखाली राजकारण करणाऱ्या छोट्या मोठ्या पक्ष-संघटनांनी आपला पक्ष किंवा गट विसर्जित करून रिपब्लिकन सेनेत समाविष्ट होण्याची इच्छा व्यक्त केल्यास त्यांना समाविष्ट करून घेण्याच्या दृष्टीने सकारात्मक विचार केला जाईल.
६) राज्य-जिल्हा-तालुका व बूथ पातळीपर्यंत सर्व कार्यकारिण्यांच्या पदाधिकाऱ्यांची आधार कार्डाच्या नंबरसह व फोटो चिकटवून नोंदणी करणे व ते सर्व पदाधिकारी अस्तित्वात आहेत याची खात्री वरीष्ठ कार्यकारिणीला पटवून देण्याची जबाबदारी त्या त्या युनिटच्या अध्यक्षांवर सोपविण्यात आलेली आहे.
७) पक्षाच्या घटनेप्रमाणे अस्तित्वात असलेली पदे भरणे व त्यांना कामाला लावणे ही जबाबदारी त्या त्या युनिट प्रमुखांची असेल हे ठरवण्यात आले.
८) यापुढे पक्षाच्या क्रियाशील कार्यकर्त्यांमधूनच पक्षाचे पदाधिकारी लोकशाही पद्धतीने निवडणूक प्रक्रियेतून निवडण्यात येतील.
९) जो पदाधिकारी योग्य कारणाशिवाय पक्षाच्या बैठकीला सलग तीन वेळा अनुपस्थित राहील त्या पदाधिकाऱ्यास पक्ष कार्यात रस नाही असे समजण्यात येईल व प्रथम त्याचे पद गोठवून त्याच्या योग्यतेनुसार त्याचे पक्षातील स्थान निश्चित करण्यात येईल.
१०) रिपब्लिकन सेनेच्या कोणत्याही विंग मध्ये काम करण्यासाठी वयाची अट राहणार नाही. पक्षनिष्ठा व प्रामाणिकपणा हे गुण जमेस धरले जातील.
११) रिपब्लिकन सेना ही केवळ राजकीय पक्ष म्हणूनच नव्हे तर डॉ. बाबासाहेब आंबेडकरांना अपेक्षित असलेली राजकीय, सामाजिक व आर्थिक चळवळ चालवण्याच्या दृष्टीने एक ‘मिशन’ म्हणून काम करीत आहे व यापुढे सुद्धा तसेच काम करेल.
१२) रिपब्लिकन सेनेचे जेष्ठ नेते काकासाहेब खंबाळकर यांच्या नेतृत्वाखाली ९ ऑगस्ट ते १७ सप्टेंबर २०२३ या काळात महाराष्ट्राच्या सर्व जिल्ह्यातून ‘संविधान समर्थन यात्रा’ काढण्यात येणार असून तिची सुरुवात ९ ऑगस्टला चैत्यभूमीतून करण्यात येईल व समारोप सुद्धा सूर्यपुत्र भय्यासाहेब आंबेडकर स्मृतीदिनाचे औचित्य साधून चैत्यभूमीतच करण्यात येईल. या कालावधीत ‘पक्ष सदस्य नोंदणी अभियान’ सुद्धा राबविण्यात येईल. काकासाहेब खंबाळकरांना सहकार्य करण्यासाठी सागर डबरासे, विजय दादा वाकोडे,प्रा.विनायकराव दुधे,प्रा.युवराज धसवाडीकर, भय्यासाहेब भालेराव, श्रीपती ढोले, योगेंद्र चवरे, ऍड. रविंद्र पाटोळे ही आठ जणांची समन्वय समिती नेमण्यात आली असून ही समिती ही संविधान समर्थन यात्रा यशस्वी करण्याबरोबरच पक्ष बांधणी सुद्धा करेल.
१३) पक्ष शिस्त, पक्ष संघटन व पक्षाची आचारसंहिता पालन या बाबींकडे विशेष लक्ष दिले जाईल.
१४) पक्षाची ‘अर्थव्यवस्था’ मजबूत करण्याच्या दृष्टीने पक्षाचे हितचिंतक, सदस्य व दाते वाढतील या दृष्टीने पक्षाची प्रतिमा जनमानसात पोहचवण्यासाठी जे जे म्हणून करणे शक्य आहे ते ते सामूहिकरीत्या करण्यात येईल.
श्रीपती ढोले

राज्य समन्वय समिती सदस्य
संविधान समर्थन यात्रा तथा
पक्ष सदस्य नोंदणी अभियान
रिपब्लिकन सेना.